Ճարահատի նամակը ՀՀ Նախագահին

                                  ( հավաքական կերպար շարքից)
Պարոն նախագահ, աշխարհին պարտք եմ 1 միլիոն 500 հազար դրամ: Վերջին տասնամյակում արտաքին պարտքս աճում է աստղաբաշխական թվերով: Ես վճարունակ չեմ, չեմ աշխատում, քսան տարի է ինչ առողջությունս թույլ չի տալիս, մեջքի խնդիրներ, գլխացավեր և այլն, բայց թոշակառու չեմ: Նպաստառու եմ, իսկ մեկ այլ կերպ ասած, ստանում եմ աղքատության նպաստ և դա էլ հասնում է իմ ընտանիքին, որովհետև իմ ընտանիքը բազմազավակ է: Թվում է թե պարտքս մի մեծ գումար չէ, բայց ես հաճախ եմ մտածում կապրոնե պարանի մասին:

Պարոն նախագահ, ես չեմ հավատում ձեր կարգախոսներին և ընհանրապես կորցրել եմ հավատքս այս կյանքի նկատմամբ, չեմ հավատում արդարադատությանը, տնտեսական աճին, խաղաղությանը և Ձեր ամպագոռգոռ կարգախոսներին և այլն, սակայն, զավեշտալին գիտեք որն է, այն որ իմ պարտատուները հավատում են, որ ես իրենց պարտքը կվճարեմ ու պատրաստ են նորից ինձ օգնելու ու պարտք տալու: Եթե ես, արդեն չունեմ հավատք այս երկրի ապագայի նկատմամբ, ապա նշանակում է, որ չեմ հավատում, որ կգտնեմ մի աշխատանք, որով կվաստակեմ այնքան, որ բոլոր պարտքերս կփակեմ:   

Հիմա, ես չեմ հասկանում, նրանք ինձ են հավատում թ՞ե Ձեզ:

Եթե պարզեցի, որ նրանք Ձեզ են հավատում, ուրեմն իմ պարտքերը Ձեր վրա կգրեմ, իսկ եթե պարզվեց, որ հավատում են ինձ, ուրեմն հաջորդ ՀՀ նախագահը ես եմ դառնալու:

Հիասթափությամբ՝ ՀՀ քաղաքացի

Հրապարակվել է 7or.am, zham.am; blognews.am և hraparak.am կայքերում

http://www.7or.am/am/news/view/40282/

http://zham.am/index.php?lid=am&pageName=ughighxosq&id=263569133

http://blognews.am/arm/news/21401/tcharahati-namaky-hh-nakhagahin-tvum-e-te-partqs-mi-mets-gumar-che-bayc-es-hatchakh-mtatsum-kaprone-parani-masin.html

http://www.hraparak.am/82321/